С.Амарсайхан: Ирэх сарын 1-ээс угаар мэдрэгчийг айлуудад тараана

Нийслэлийн Засаг дарга С.Амарсайханаас сайжруулсан түлштэй холбоотой зарим зүйлийг тодрууллаа. 

-Утаа мэдэрдэг төхөөрөмж тараах асуудлыг Засгийн газрын хуралдаанд оруулсан юм уу?

-Угаарын хий мэдрэх төхөөрөмжийг суурилуулах, айл өрхүүдэд тараах асуудлыг Засгийн газрын хуралдаанд оруулж, танилцууллаа. Бид сайжруулсан түлшний хэрэглээг жигдрүүлэх, хэвшүүлэх хэрэгтэй. Утаанаас болж жилдээ хэдэн мянгаараа хүн хордож, урагт хүртэл нөлөө үзүүлж байгаа.  Гамшгийн хэмжээнд хүрсэн утааг бууруулахад чиглэсэн ажлаа хот хийх ёстой. Гэхдээ хяналтаа маш сайн тавьж, иргэдээ эрсдүүлэхгүй байх нь бидний үүрэг.  Тиймээс угаар мэдрэгч төхөөрөмжийг айл өрхүүдэд тарааж өгөх асуудлыг Засгийн газарт орж танилцуулаад, шийдвэрлүүллээ.  Арваннэгдүгээр сарын 1-ээс өмнө айл өрхүүдэд угаарын хийг мэдрэгч бага оврын төхөөрөмжийг суурилуулж өгөхөөр боллоо. 

-Хаанаас оруулж ирэх вэ, хөрөнгө мөнгийг нь яаж шийдэх юм бол?

-Гэр хорооллын 200 гаруй мянган айл өрх байгаа.  Бид дахин айл өрхийн судалгааг нарийвчилж гаргана. Зарим айл нь төвийн халаалтад холбогдсон.  Цахилгаан халаагуур хэрэглэж байгаа айлууд ч бий. Тиймээс нарийвчилсан судалгаа хийж, бодит тоо гаргана. Дараа нь хаанаас, ямар төхөөрөмж оруулж ирэх боломжтойг мэргэжлийн байгууллагууд судална. Аль төхөөрөмж нь илүү байхыг судалж үзнэ гэсэн үг. Хөрөнгийн эх үүсвэрийг нь Агаарын бохирдлыг бууруулах Үндэсний хорооноос гаргана. 

-Ойролцоогоор хэдэн төгрөгийн санхүүжилт хэрэгтэй байгаа вэ?

-Одоохондоо яг тэд гэсэн тодорхой тоо гараагүй байна.  Төхөөрөмж нь харьцангуй үнэтэй.  30, 40 мянган төгрөгийн үнэтэй нь ч байгаа. Бүр 300, 400 мянган төгрөгийн үнэтэй нь бий.  Гэхдээ хамгийн чанартай, стандартын шаардлага хангасан, гэхдээ үнэ хямдтай төхөөрөмжийг нийлүүлэх ёстой гэж бодож байгаа.  Гол нь энэ дунд бизнес, шахаа, цавчаа, нэмээ орох ёсгүй. Тиймээс шууд үйлдвэрлэгчтэй нь харилцаж, хямдаар авахаар ярьж байна. 

-Айлуудад үнэгүй суурилуулж өгөх юм уу?

-Нэг удаа үнэгүй суурилуулж өгье гэж байгаа юм.  Барилга, байшинд утаа мэдрэгч төхөөрөмж байдаг. Харин айлуудад байдаггүй. Тиймээс айлууд утаа мэдрэгч дохиолол хэрэглэж, аюулгүй байдлаа хангаж сурах хэрэгтэй.  Бид ч гэсэн талаар анхаарах ёстой.  Хэзээ, хэн эрсдэх бол гэж хүлээгээд сууж болохгүй шүү дээ.  Өнөөдрийн байдлаар 200 мянган айлын 49 хувьд нь заавар, зөвлөгөө өгөөд явж байна. 

-Үйлдвэрлэлийг хаасан юм уу. Бас онцгой бүс болгох шийдвэр гарсан гэсэн?

-Үйлдвэрлэлийн бүсийг онцгой бүс болгосон. Яагаад гэвэл, хүн амын эрүүл мэнд, аюулгүй байдалтай холбоотой асуудал учраас янз янзын шалтгаанаар горим алдагдах, хөндлөнгийн нөлөө орохоос урьдчилан сэргийлж онцгой бүс болгож, хамгаалалтад авах ёстой. Үйлдвэр зогсоогүй, хэвийн үргэлжилж байгаа. Цаашид ч үргэлжлэх л ёстой. 

Эх сурвалж:Zaluu.com

Сэтгэгдэл (0)
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.