ШУУД: “Бидний бүтээл сансарт” бөмбөлөг хөөргөх ёслол болж байна

Нийслэл Улаанбаатар хотын түүхт 380 жилийн ойг тохиолдуулан Монголын Сансрын судалгаа хөгжүүлэлтийн төв /МАРСА/-ийн санаачилгаар Сүхбаатарын талбайд  “Улаанбаатар 380-Сансар өөд” арга хэмжээг зохион байгуулж сансрын бөмбөлгийг 38 мянган метрийн өндөрт хөөргөлөө. 

Монгол Улс нь задгай сансарт бөмбөлөг хөөргөсөн дэлхийн анхны улс болж байгаагаараа онцлог юм. 

Хоорондоо 30 минутын зайтай хөөрсөн гурван цуврал сансрын бөмбөлгийг хөөргөх үйл ажиллагаанд НИТХ-ын дарга Р.Дагва, Нийслэлийн Засаг дарга бөгөөд Улаанбаатар хотын Захирагч С.Амарсайхан, БНМАУ, ЗХУ-ын баатар сансрын нисгэгч Ж.Гүррагчаа, Монголын Сансрын судалгаа хөгжүүлэлтийн төвийн захирал Г.Амгаланбаяр, ШУА-ын Одон орон геофизикийн хүрээлэнгийн захирал, академич доктор С.Дэмбэрэл болон бусад албаны хүмүүс, иргэд, олон нийт, оюутан залуус оролцлоо.

Сансрын бөмбөлөг хөөргөх үеэр “Бидний бүтээл сансарт” уралдааны шилдэг бүтээлийг шалгаруулж, шагналыг хотын удирдлагууд гардуулан өглөө. Уралдаанд нийслэл Улаанбаатар хот болон Сүхбаатар, Дархан-Уул, Баянхонгор, Орхон, Хэнтий, Сэлэнгэ, Өвөрхангай, аймгийн ЕБС-ын сурагчдын 84 бүтээл ирсэн байна. Үүнээс МУБИС-ийн харьяа Лицей сургуулийн “Цагаан шонхор” багийн бүтээл нэгдүгээр байрт, Өсвөрийн зохион бүтээгчдийн лаборатори ахлах сургуулийн “О2” багийн бүтээл хоёрдугаар байрт, Баянзүрх дүүргийн “Глобал” олон улсын дунд сургуулийн “Глобал” багийн бүтээл гуравдугаар байрт тус тус шалгарчээ.

Сансрын бөмбөлөгт уралдааны шилдэг бүтээлээс гадна www.marsa.mn сайтад бүртгүүлсэн 5745 хүнээс санамсаргүй түүврийн аргаар сонгосон 380 иргэний нэрийг хөөргөв. Үүний зэрэгцээ сансрын бөмбөлөгт суурилуулсан тусгай мэдрэгчүүд хөөрөх явцдаа Нийслэл хотын агаарын чанарыг хэмжих тоон мэдээлэл цуглуулж, хэмжилт хийх даалгаврыг давхар гүйцэтгэнэ гэдгийг зохион байгуулагчдын зүгээс онцолж байв.

Сэтгэгдэл (0)
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.