Турк улс 31 оронд хилээ нээжээ

2020 оны 05 сарын 21

Турк улс тавдугаар сарын 20-ны өдрөөс 31 орны иргэдэд хилээ нээж өгчээ. Гадаадын иргэд аялж зугаалах бус зөвхөн эрүүл мэндийн үйлчилгээ  авах зорилгоор тус улсыг зорих боломжтой юм байна. 

31 улсад: Ирак, Ливи, Азербайжан, Гүрж, Туркменистан, Узбекистан, Казахстан, Грек, Украйн, Орос, Жибути, Алжир, Косово, Македони, Албани, Босни Герцеговин, Румын, Серб, Болгар, Молдав, Сомали, Кувейт, Катар, Бахрейн, Оман, Герман, Их Британи, Нидерланд, Пакистан, Киргизстан, Умард Киприйн Бүгд найрамдах Турк улс багтаж байна. 

Одоогоор далайн эрэг орчмын амралт зугаалгын газрууд жуулчдад хаалттай байгаа бөгөөд Турк гаднын иргэдийг үе мөч, гэмтэл, хүүхдийн мэс засал, бөөр шээсний замын өвчин, нүд, зүрх судасны мэс засал, мэдрэл зэрэг олон төрлийн эрүүл мэндийн үйлчилгээ үзүүлэх боломжтой гэнэ. Онгоц зөвхөн Истамбул, Анкарагийн онгоцны буудал руу нисэх ба өвчтөнтэй хамт хоёр хүн дагаж явах боломжтой аж. Зорчигчид коронавирусгүй гэдгээ нотлох баримттай ирэх эсвэл Туркэд ирээд төлбөр төлж шинжилгээнд хамрагдах боломжтой гэнэ. Хилээр нэвтэрсний дараа өвчтөн болон дагаж явж байгаа хүмүүс шууд эмнэлэгт очиж, эмчилгээний хугацаанд тэндээ байрлах ёстой аж. Туркийн эмнэлгүүдэд гадаад улсын иргэдэд зориулж тусгай бүс, тусдаа шат гаргаж өгөх юм байна. 

Тус улсад нийт батлагдсан халдварын тоо 152 мянга давж, уг вирусийн улмаас нас барсан хүний тоо 4200 хүрсэн бол  нийт 113 мянган өвчтөн эдгэрчээ.

Сэтгэгдэл (1)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
2020 оны 05 сарын 21
202.70.34.70
иргэн

Манай иргэдийг яагаад авахгүй байна. За за, исламын шашинтай улсуудаас хол байсан даа л сайн доо. Манайх ч бас турк иргэдийг бүү оруулаарай.