СУРВАЛЖИЛГА: Гэртээ “хоригдсон”  хүүхдүүдийн  ГЭГЭЭХЭН ертөнцөөр аялая  

2020 оны 06 сарын 01

Өнөөдөр зургадугаар сарын 1. Олон улсын хүүхдийн эрхийг хамгаалах өдөр. Одоогоос 95 жилийн өмнө буюу 1925 онд “Женевт” хүүхдийн сайн сайхны төлөө дэлхийн чуулга уулзалт болж байжээ. Чуулга уулзалтаас зургадугаар сарын 1-ний өдрийг дэлхий нийтээрээ “Хүүхдийн эрхийг хамгаалах өдөр” болгох уриалга гаргасан байдаг юм.

Улмаар 1951 онд Олон улсын ардчилсан эмэгтэйчүүдийн холбооноос хүүхдийн эрхийг хамгаалах өдрийг улс орон бүр тодорхой өдөр тэмдэглэж, хүүхэд багачуудаа баярлуулж байхаар шийдвэрлэсэн байна.

Харин Монгол Улс 1952 оноос эхлэн зургадугаар сарын 1-ний өдрийг “Хүүхдийн баяр”-ын өдөр болгон жил бүр тэмдэглэж ирсэн юм. Энэ жил дэлхий нийтэд үүссэн цар тахалтай холбоотойгоор хөл хорио тогтоогоод байгаа. 

Зөв.мн сайт Хүүхдийн баярын өдрийг тохиолдуулан бяцхан үрсийн  хүүхдийн баярын талаарх  бодол, хүсэл мөрөөдлийг нь сонирхон  гэгээхэн  ертөнцөөр аялалаа. Хэдийгээр хөл хориотой байгаа ч  тэд баяраа тэсэн ядан хүлээсэн хэвээр. 

ТОГЛООМ АВЧ ӨГНӨ ГЭСЭН

No description available.

-Чамайг хэн гэдэг вэ?
-Намайг Учрал гэдэг.
- Хэдэн настай вэ?
- Зургаан настай. 
- Нэгдүгээр ангид орсон юм байна. Үсгээ үзэж амжсан уу?
- Тиймээ. Үсгээ үзчихсэн.
- Ямар ямар үсэг мэдэх вэ. Одоо уншиж чадах уу?
- Бүх үсгээ мэднэ. Уншиж сурсан.

- Ангийнхаа хүүхдүүдийг санаж байна уу?
- Санаж байна
- Теле хичэлээ хийж байгаа юу?
- Хийж байгаа.

- 6 сарын 1 юуны өдөр вэ?
- Хичээлд ордог өдөр
- 6 сарын 1 олон улсын хүүхдийн эрхийг хамгаалах өдөр шүү дээ. Энэ өдөр аав ээжүүд хүүхдүүдээ баярлуулдаг. Харин чи аав ээжтэйгээ юу хийдэг вэ?
- Аав ээжтэйгээ паркт очиж тоглодог. Өвөө эмээгээсээ бэлэг авдаг. Тэгээд гоё хувцсаа өмсдөг. Уг нь Туркээс анайгаас гоё бэлэг ирдэг байсан. Энэ жил гоё бэлэг ирж чадахгүй гэсэн.
 

- Энэ жил аав ээж хоёр нь хэрхэн баярлуулна гэж байна вэ?
- Гэрээс гарахгүй тоглоом авч өгнө гэсэн.
- Ямар тоглоом авахыг хүсэж байна вэ?
- Эвлүүлдэг тоглоом
 

ХИЧЭЭЛ ХУРДАН ОРООСОЙ

No description available.

-Чамайг хэн гэдэг вэ. Хэддүгээр ангид сурдаг вэ?
- Билгүүнтөгс гэдэг. Гуравдугаар ангид сурдаг. Би сургуульдаа дандаа математикийн олимпиадад ордог байсан.
- Хичээл орохгүй байхаар ямар байна вэ?
- Онцгүй л байна. Хурдан хичээл ороосой
- Ангийнхаа хүүхдүүдийг санаж байна уу?
- Санаж байна. Хааяа найзуудтайгаа утсаар ярьдаг.
- 6 сарын 1 ямар өдөр гэдгийг мэдэх үү?
- Хүүхдийн баяр
- Өмнө нь хүүхдийн баярыг яаж тэмдэглэдэг байсан бэ?
- Аав ээжтэйгээ паркт очиж тоглодог байсан. Тэгээд хүмүүсээс зөндөө бэлэг авдаг байсан 
 

- 6 сарын 1-ний өдөр хүүхдийн эрхийг хамгаалах өдөр гэж мэдэх үү?
- Мэдэхгүй.
- Аав ээж нь энэ жил хэрхэн баярлуулна гэж байна вэ?
- Мэдэхгүй
 

ГОЁ ЦАГААН ПЛАТЬЕ ӨМСӨӨД ХӨӨРХӨН БОЛДОГ

No description available.

- Миний дүүг хэн гэдэг вэ. Чи хэдэн настай вэ?
- Намайг  Энхмишээл гэдэг. Би 6 настай
- Сургуульд орсон уу?
- 9 сард сургуульд орно гэсэн
- Сургуульд орох гоё болов уу?
- Гоё гэж боддог
- 6 сарын 1-ний өдрийг яаж тэмдэглэж байсан бэ?
- Скүүтэр авч тэмдэглэж байсан. Тэгсэн чинь манай агаа миний скүүтэрийг эвдэлчихсэн.
- Скүүтэргүй болчихсон уу?
- Аанхаан. 


- Энэ жил аав ээж  нь 6 сарын 1-ний өдрийг хэрхэн өнгөрүүлнэ гэж байна вэ?
- Парк дээр очоод тоглуулна гэсэн
- Энэ жил парк ажиллахгүй шүү дээ?
- Өөөө 
- Гоё хувцасаа өмсдөг үү?
- Өмсдөг. Гоё цагаан платье өмсөөд хөөрхөн болдог
 

 ДУГУЙ АВЧ ӨГНӨ ГЭСЭН

No description available.

 

 

 

 

 

 

 

 

 

 

 

 

 

 

 

 

 

 

 

 

 

 

 

- Өөрийгөө танилцуулаач?
- Намайг Чингүүн гэдэг. 
- 6 сарын 1-ний өдрийн хэрхэн тэмдэглэн өнгөрүүлдэг байсан бэ?
- Ээжийн ажил руу явж тэмдэглэдэг байсан. Бэлэг авна, кино үзэж гадуур явдаг байсан
- Хэдэн настай вэ. Хэддүгээр ангид сурдаг вэ?
- 9 настай. Одоо зургадугаар ангид орно
- Ээжийнх нь ажлын газар жил бүр баярлуулдаг уу?
- Тийм. Бэлэг юмуу мөнгийг нь өгдөг
- 6 сарын 1-ний өдрийг хүүхдийн баяр гэж боддог уу?
- Үгүй. Эх үрсийн баяр гэж боддог.
- 6 сарын 1 ямар өдөр вэ?
- Хүүхдийг хамгаалдаг өдөр


- Юунаас хамгаалдаг юм бол?
- Аюул ослоос хамгаалдаг
- Энэ жил аав ээж нь хэрхэн тэмдэглэж өнгөрүүлэх бол?
- Надад дугуй авч өгнө гэсэн.

ХӨДӨӨ ЯВНА ГЭСЭН

- Өөрийгөө танилцуулахгүй юу?
- Намайг Есүлэн гэдэг. Одоо 11 настай
-Хичээл орохгүй байгаа нь ямар байна?
- Дажгүй ээ
- 6 сарын 1-ний өдрийг хэрхэн тэмдэглэдэг байсан бэ?
- Өмнө нь парк дээр очиж тоглодог байсан. Бэлэг авч өгдөг байсан
- Энэ жил хөл хориотой учраас парк ажиллахгүй шүү дээ. Тэгэхээр аав ээж нь хэрхэн тэмдэглэнэ гэж байна вэ?
- Энэ жил надад бэлэг авч өгнө гэсэн
- Ямар бэлэг авч өгөх бол?
- Дугуй авч өгнө гэсэн. Би бас морь унаж чаддаг. Тэгээд хөдөө явна гэсэн. 
 

- 6 сарын 1 ямар өдөр билээ?
- Хүүхдийн эрхийг хамгаалах өдөр

ЖООХОН Л УНШИЖ ЧАДНА               

No description available.

/Зүүн гар талаас Хулан, Мичидмаа, Содхүү/

- Чамайг хэн гэдэг вэ. Хэдэн настай вэ?
- Намайг Мичидмаа гэдэг. 6 настай
- Сургуульд орсон уу. Үсгээ үзэж амжсан уу?
- Орсон. Үсгээ сайн мэдэхгүй. Жоохон л уншиж чадна.
- Сургуульд ороход ямар байсан бэ?
- Гоё байсан. Олон найзуудтай болсон
- 6 сарын 1-ний өдрийг яаж тэмдэглэдэг байсан бэ?
- Платье өмсөөд бэлэг авдаг байсан

                                                                                                             ТЕЛЕ ХИЧЭЭЛИЙГ САЙН ОЙЛГОХГҮЙ БАЙГАА
- Өөрийгөө танилцууулахгүй юу?
- Намайг Хулан гэдэг. 10 настай, одоо тавдугаар ангид орно
- Хичээл орохгүй байхаар ямар байна вэ?
- Уйтгартай байгаа
- Теле хичээлээ үзэж байгаа юу?
- Ерөөсөө үзэж амждаггүй шд.
- Теле хичээлээр гарч байгаа хичээлүүдээ хэр ойлгодог вэ?
- Тийм ч сайн ойлгодоггүй 


- 6 сарын 1 ямар өдөр вэ. Үүнийг мэдэх үү?
- Хүүхдийн баяр гэж боддог.
- 6 сарын 1-ний өдрийг өмнө нь хэрхэн тэмдэглэдэг байсан бэ?
- Аав ээж хоёртойгоо парк, цэцэрлэгт хүрээлэн орж тоглодог байсан. Тэгээд эмээгээсээ бэлгээ авдаг. Бас таньдаг айлуудаараа орж бэлэг авдаг байсан.

- Бэлгэнд юу авдаг байсан бэ?
- Чихэр жимс, ундаа чипс авдаг байсан
- Энэ жил аав ээж нь хэрхэн тэмдэглэнэ гэж байна вэ?
- Мэдэхгүй. Аав ээж хоёр хэлээгүй байгаа. Хорио тавигдтал гэртээ л байна байх.


- 6 сарын 1-ний өдөр хүүхдийн эрхийг хамгаалөх өдөр гэж мэдэх үү?
- Мэднэ
- Хүүхдийн эрхийг хамгаална гэхээр яадаг юм бол, юу гэсэн үг юм бол?
- Мэдэхгүй. Хүүхдүүддээ анхаарал тавихыг хэлж байгаа юм бол уу

 ХҮҮХДИЙН ЭРХИЙГ ХАМГААЛАХ ӨДӨР ГЭЖ БОДДОГ

- Чамайг хэн гэдэг вэ. Өөрийгөө танилцуулахгүй юу?
- Намайг Содхүү гэдэг. 11 настай. Одоо зургадугаар ангид орно.
- Хичээл орохгүй байхаар юу хийж байна вэ?
- Гэртээ л байна. Хичээл орохгүй байхаар уйтгартай юм.
- Жил бүр 6 сарын 1-нд юу хийдэг байсан бэ?
- Гадуур л явдаг байсан. Парк, цэцэрлэгт хүрээлэн ордог байсан
- Энэ жил хөл хорио тогтоосон болохоор гадуур явахыг хориглосон байгаа. Тэгэхээр энэ жил юу хийх бол?
- Гэр бүлийн хүрээнд л тэмдэглэх байхдаа. 
- Энэ өдрийг өөрөөр юу гэж боддог вэ?
- Хүүхийн эрхийг хамгаалах өдөр гэж боддог. 

Бяцхан үрс маань энэ л өдөр баярын бэлгээ авах гэж тэсэн ядан хүлээдэг. Тэдэнд зориулсан баярын бэлэггүйгээр ч төсөөлөхийн аргагүй юм. Гэсэн ч мэргэжлийн байгууллагынханы зүгээс хор нөлөөгүй бэлэг сонгохыг зөвлөж байгаа. Ууттай бэлгэнд ихэвчлэн ундаа, жүүс, чипс, чихэр, печень хийсэн байдаг. Иймд бид томоохон худалдааны төвүүдээр орж бэлэгний үнэ ханш болон ямар бэлэг илүү эрэлттэй байгааг сонирхсон юм. Худалдаачид “Энэ жил ууттай бэлэг гэхээс илүү тоглоом эрэлттэй байна. Жишээлбэл, консуни, тайёо зэрэг хүүхэлдэйн киноны тоглоомнууд борлуулалт сайтай байна” гэж байлаа. 

Ууттай бэлгийн үнэ ханшийн хувьд, хамгийн хямд нь 2500 төгрөгөөс эхэлж байв. Дундаж үнэтэй нь 7500-15000 төгрөгийн хооронд байгаа бол, үнэтэй нь 24000-35000 төгрөгийн ханштай худалдаалагдаж байлаа. Гэсэн ч худалдан авагч эцэг эхчүүдийн хувьд боосон бэлэгнээс илүү хүүхдийнхээ идэх дуртай ааруул, соруултай сүү, үлгэрийн  ном, тоглоом гэхчилэн эрүүл бэлгийн сонголт хийж байсан юм. 

Сонирхуулахад, мэргэжлийн байгууллагаас хийсэн судалгаагаар дан амттан орсон нэг бэлгийн багцад ойролцоогоор 10 гаруй нэр төрлийн бүтээгдэхүүн байдаг байна. Ингэснээр тухайн бэлгэнд 500 грамм орчим сахарын хэмжээ агуулагддаг аж. Харин ДЭМБ-ын зөвлөснөөр бага насны хүүхэд өдөрт таван грамм, сургуулийн насны хүүхэд 6-8 грамм сахар хэрэглэх нь тохиромжтой хэмээн үздэг байна.

 

Т.Дашмаа
 

Сэтгэгдэл (1)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
2020 оны 06 сарын 01
202.170.70.86
irgen

huuheduuddee bayrin mend hurgey ee