''Чонын'' ходоодтой Исландчуудын 15 өвөрмөц хоол

2020 оны 07 сарын 27

Үржил шим муутай хөрс, эрс тэс уур амьсгалтай хүчирхэг зоригт Викингүүдийн нутаг Исландад нарийн ногоо ургуулахад тун бэрх. Тиймдээ ч тэдний хоолны цэс амттай хоолнуудаар баялаг биш. Ямар ч хоол хүнсний хаягдал гаргахгүй хэмээн шийдсэн болов уу гэмээр үндэсний хоолнуудтай. Халимын өөхийг сүүн хүчилд болгож баярын ширээндээ тавьдаг ард түмний өвөрмөц хоолнуудтай танилцацгаая. 

 

Хаукарль Гренландын аварга загасны ''борц''
Гренландын туйлын загасны мах шинээрээ хортой байдаг. Учир нь эдгээр аварга загаснуудад шээсний сүв байдаггүй учир биедээ маш их хэмжээний аммиак агуулж байдаг байна. Тиймдээ ч хорыг нь гаргахын тулд хайрга чулуугаар дүүргэсэн саванд махыг хийж таглаж орхиод 6-8 долоо хоногийн дараа гаргаад, үргэлжлүүлэн 3-4 сар гадаа салхинд хатааж борцолдог. Нутгийн иргэдийн хувьд хамгийн идэх дуртай хоол болсон уг аварга загасны мах нь маш хурц, эхүүн үнэртэй байдаг тул идэх хүсэл огт төрөхөөргүй гэнэ шүү. 

 

Сальтфискур Давсалсан загас
Хоол хүнс хадгалах шалгарсан арга бол давслах явдал. Гэхдээ Исландчууд давсаа хэтрүүлчxээд байдаг нэг гэмтэй. Давсалж хатаасан загасны махаа хоолондоо хэрэглэхийн тулд хэдэн цаг, заримдаа хэдэн өдрийн турш усанд дэвтээх хэрэг гардаг. 

 


Хангикьот Утсан хонины мах
Дүүжлүүр мах нэртэй уг зоог нь Викингүүдийн баярын хоолны нэг юм. Утсан махаа чанаж эсвэл түүхийгээр нь идэж хэрэглэдэг. 

 

Геллур сагамхай загасны хэлэн зууш
Шарах шүүгээнд болгосон сагамхай загасны хэл салахын аргагүй амттай хэмээн Исландчууд ярьдаг. Энэ нь ч үнэний ортой. Заримдаа шарах шүүгээнд болгохын оронд усанд буцалгаж иддэг. 

 

Хардфискур хатаасан загас
Маш хуурай, хатуу хатаасан загасыг жуулчид идэж чаддаггүй. Харин хоол хүнсэндээ их хэмжээний тос хэрэглэдэг Исландчууд уг хатаасан загасыг ''тосон дунд хөлбөрүүлж'' байгаад л залгичихдаг гэнэ.

 

Галт уулын талх
Бараан өнгөтэй, бага зэргийн чихэрлэг амттай уг талхыг жуулчид ч амаа олохгүй иддэг. Масло эсвэл утсан загастай хольж идэхэд сайхан амттай. Талхны зуурмагаа металл саванд хийж галт уулын идэвхжилтэй газрын ойролцоо хөрсөнд булаад маргааш нь ирэхэд талх бэлэн болсон байна. 

 

Лунди салхич шувууны мах
Сүүн сүмсэнд чанаж эсвэл утаж иддэг. Салхич шувуу Исландын нутгаар их тархсан учир уг хоолыг ихээр хэрэглэдэг.

 

Хвалспик халимын өөх
Халимын өөхийг сүүн хүчилд болгосноор уг хоолыг хийдэг. Орчин үед нутгийн иргэд ч энэхүү хоолыг идэхээ больжээ. Учир нь маш их илчлэгтэйгээс гадна амт нь тийм ч сайхан бус гэнэ.

 

Слатур гэдэс дотор
Цус болон өөх зэргийг нарийн бүдүүн гэдсэн хийж чанаж болгоод чихэрлэг будаатай хольж иддэг. Хачирхалтай байгаа биз.

 

Xонины толгой
Үс ноос, тархийг нь гарган цэвэрлэж буцалгаад иддэг. Монголчуудын нэгэн адил хэл, нүд зэрэг бүхнийг иддэг.

 

Хрутспунгур  залуу хонины төмсөг
Исландчууд нэгэн цагт ядуу тарчигийн зовлонд нэрвэгдэж идэх хоолгүй болжээ. Тухайн үедээ эр хонины төмсгийг гурилтай хольж жигнээд эсвэл желатинтай хольж иддэг байжээ.

 

Халимын мах
Минке халимын мах бол Исландчууд хүнсний эх үүсвэр гэж хэлэхэд болно. Халимын махаар стэйк, кебаб тэр бүү хэл сүши хийж иддэг. Туна болон үхрийн мах 2-ыг хольсонтой ижил амтагддаг гэнэ.

 

Кёцупа ногоотой шөл
Ерөнхийдөө монгол ногоотой шөлтэй төстэй кёцупа шөлийг нутгийн иргэд маш амттай гэдэг.

 

Скир йогурт
Илчлэг багатай уг таргийг Исланд гэлтгүй дэлхий нийтээр хэрэглэх дуртай.

 

Бреннивин ''хар үхэл'' дарс
Махчилж орчуулбал ''Түлэгдсэн дарс'' нэртэй уг дарсыг төмс болон гоньдоор хийдэг. Гашуун амт, өндөр градустай уг дарсыг Исландчууд ''хар үхэл'' хэмээн нэрийддэг байна. 

Эх сурвалж: ЗӨВ.МН

 

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.