Р. Эмүжин: Төрт ёсоо хүндэтгэдэг монгол түмний сэтгэлийг наадмаар БҮҮ ХЭМЖ


Монгол төрийнхөө сүлдэд, мохошгүй бэлгэдэлт далбаанд зөв хүндэтгэл үзүүлж, зөв мэхийх нь өөрөө арга билэг, агуулга хэлбэрийн асар том философи, дорнын монгол соёл юм аа, Номин! 

Энэ бүхэнд суралцаж, монгол соёлын хэлтэрхийг өөртөө суулгасныхаа дараа төрт ёсны тухай ярина уу. Түмэн олон чинь төрт ёсоо дээдлээгүйдээ бус, тэрсэлж зөрүүдлээд байгаадаа бус, ухамсар ухаан нь багадсандаа бус, өвчин зовлонд хөл алдаж, нулимс харуусалд гүн автсандаа улсын наадмаа хойшлуулъя гэж учирлаж байна. 

Өнөөдрийг хүртэл вирусээр амиа алдсан 500 шахам иргэн, тэдний ар гэрийнхэн, анд нөхөд, хамт олон, яг одоо өвдчихөөд шинжилгээнд дугаарлаж, эмийн сан руу гүйж, арга тасран мөнгөгүйдэхийн зовлонд автаж, агаар амьсгалах гэж аппаратад дугаарлаж, эмнэлэг олдохгүй тарчилж, эргэж ирэхээ мэдэхгүй түргэний тэргэнд ачуулж байгаа хэдэн мянган хүн, тэдний хажууд адилхан амьдралаас зууран тогтож буй ах дүү, хамаатан садан нь, дээр нь сульдаад унахад ойрхон болсон эмнэлгийн хэдэн мянган эмч сувилагч, жил гаруй үүрэг хүлээн ажиллаж байгаа онцгой байдал, цагдаагийн албан хаагчид, бизнесээ хаалгаж, зээлдээ баригдсан олон зуун өрх бүл, хувь хүний тоог гаргаад үзээрэй. 

Тоолоод үз, олуулаа байгаа, та нар харин энэ удаа цөөнх болчихлоо. 

Тэд бүгд наадмыг эсэргүүцдэг ухамсаргүй монгол, төрт ёсноосоо гаждаг тэнэг монгол, үндэсний соёлоосоо татгалздаг үхэр монгол юм бол би нэг нь байна, мэдэж ав. 

Яамны ажилтнуудаа ариун цэврийн өрөөгүй болгож байгаад засч авсан нөгөө кофены буландаа ганцаараа сууж байгаад бодоод үз. Хувцаслалт, нүүр будаг, хувирал, хуйлран дагах чинь өөрөө худлаа байна, хуруу хүүхэлдэй шиг хачин байна. 

Эмэгтэй хүн юм даа гэж хайрлаад энэ хүртэл дуугүй явлаа. Төрийн түшээ болохдоо төрийн далбаандаа ангалзтал инээгээд арай л хүндэтгэлгүй, ёсгүй, бишрэлгүй хандахад чинь дуугараагүй шүү. 

Хүний сайхан охин гэнэдээ л биз, залуу хүн байна даа, араас нь ололт дагуулаасай гэж хүлээсэн. Харин одоо сайдтан та төрт ёс, төр түмнээ хүндэтгэн хайрлах монголчуудын сэтгэлийг наадмаар бүү хэмж, намаар бүү заагла, албан тушаалаар бүү шах, алагчилж бүү үз! 

Төрийн сүлдэндээ залбирдаг эцэг, түмний төлөө сүүгээ өргөдөг эхчүүд, уламжлал соёлоороо гоёдог залуус, уухайн дуугаараа ижилсдэг иргэд чинь нулимстай байна...



Сэтгэгдэл (5)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
  • 66.181.161.119
    2021/06/28

    Тиймээ өвчин хуучтай аав ээжээ, нялх балчир үрсээ алдчих вий гэсэн гэр бүлүүд эмнэлгийн ор хайгаад бэдэрч явна. Эмнэлэгт аз болж ор гарч хэвтсэн нь ханиалга, хатгаатай, зарим нь хүндрээд сэхээнд хэцүүхэн байна. Эмч сувилагч асрагчид нь өдөржин хувцасаа тайлахгүй учир балга ус ч амсахгүй ядарч туйлдаж байна. Юун наадам зугаа вэ.

    Хариулах
  • 66.181.161.95
    2021/06/28

    Эмүжиндээ баярлалаа. Аливаад ухааны цараагаар ханддаг мундаг эмэгтэй дээ

    Хариулах
    • 64.119.21.95
      2021/06/28

      Тийм шүү.

  • 66.181.180.141
    2021/06/27

    өөрсөдийгөө 80-д оныхан гэх хөөрхөн залуус өв соёл гэх ч өөрсөдөө ам ангайвал нэгдсэн улсаар жишээ авч соёл гэж ярих нь монгол уу? хэдийдээ америкжсан юм гэмээр ?хэдэн үеэрээ АНУ-д амьдарсан бол бас яая гэхэв дээ нэмээр

    Хариулах
  • 188.146.103.35
    2021/06/27

    Иргэд чинь нулимсаар хооллож байна

    Хариулах