10 жилийн өмнө үйлдэгдэж, 7 жил шалгасан Ш.Батхүү, Ч.Ганзориг нарын хэргийг өнөөдөр шүүнэ

2020 оны 08 сарын 05

Нийслэлийн прокурорын газраас яллах дүгнэлт үйлдэж ирүүлсэн шүүгдэгч Ш.Батхүү нарын холбогдох зургаан хүний эрүүгийн хэргийн урьдчилсан хэлэлцүүлгийн шүүх хуралдааныг Хан-Уул дүүргийн Эрүүгийн хэргийн анхан шатны шүүх 2020 оны 7 дугаар сарын 24-ны өдөр хэлэлцэж, нэр бүхий яллагдагч нарыг шүүхэд шилжүүлсэн. Улмаар тэднийг гэм буруутай эсэхийг эцэслэх шүүх хуралдаан өнөөдөр /2020.08.05/ 10:00 цагт товлогдоод байна. 

Одоогоос 10 жилийн өмнө үйлдэгдэж, 2013 оноос хууль  хяналтын байгууллага шалгаж эхэлсэн уг хэрэг  мөрдөн байцаалтад хэдэнтээ буцаж, хэрэгт холбогдогч Ш.Батхүү цагдан хорьсон ч батлан даалтад гаргасан юм. Сүр дуулиантай эхэлж, "Эрдэнэт" үйлдвэрийг их хэмжээгээр хохироосон гэгдэж байсан  ч  Монгол Улс арбитрт ялагдаж, татвар төлөгчдийн мөнгөөр "Стандарт" банкны өр төлбөрийг төлөөд байгаа. Эцэст нь Ш.Батхүү нар тамга, тэмдэг хуурамчаар үйлдсэн гэх залилангийн шинжтэй зүйлчлэлээр хөнгөн ял авах гэж байна. 

Хэргийг сануулбал   “ЖАСТ” группийн захирал Ш.Батхүү 2009-2010 онуудад Өмнөд Африк дахь “Стандарт” банканд “Эрдэнэт” үйлдвэрийн 51 хувийг барьцаанд тавьж улмаар 2012 оныг хүртэлх хугацаанд 160.1 гаруй сая ам.долларын зээл авсан байдаг. Үүнтэй холбогдуулан түүнтэй хамт Эрдэнэт үйлдвэрийн дарга асан Ч.Ганзориг нарыг буруутган АТГ-аас шүүхэд шилжүүлээд байгаа. Гэхдээ тэднийг улсад их хэмжээний хохирол учруулсан  үндэслэлээр бус  эрх мэдэл, албан тушаалаа урвуулан ашиглаж, бусдыг залилсан гэх үндэслэлээр яллах дүгнэлт үйлджээ. 

Ш.Батхүү Өмнөд Африк дахь “Стандарт” банканд “Эрдэнэт” үйлдвэрийн 51 хувийг барьцаалж авсан 160.1 гаруй сая ам.долларын зээлээ хугацаанд нь бүрэн төлөөгүйгээс "Стандарт” банк  Олон улсын арбитрын шүүхэд хандаж, “Эрдэнэт” үйлдвэрээс 86.95 сая ам.долларыг нэхэмжилсэн.  Энэ мөнгийг  Монгол Улсын Засгийн газар, “Эрдэнэт” үйлдвэрийн Эрсдэлийн сангаас гаргаж банкны өрийг нь дарсан  гэгддэг. 

“Жаст” группын захирал асан Ш.Батхүү 2013 онд хэвлэлийн хурал  зарлан энэ талаар анх удаа ам нээж байв. Тэрбээр "2009 онд “Хадгаламж” банкийг ихээхэн хэмжээний өртэй, бараг дампуурлын ирмэг дээр байхад нь худалдаж авч байсан.  Нийт активын хэмжээ нь 80 тэрбумаар тоологдсон, үйл ажиллагаа нь доголдсон “Хадгаламж” банкийг худалдан авсан цагаас эхлээд л маш их хөрөнгө оруулалт хийсэн.  “Хадгаламж” банкнаас гадна өр зээлэндээ баригдаж, үйл ажиллагаагаа явуулж чадахгүйд хүрсэн “Монгол шуудан” банк, гадаад дотоодын банкуудад ихээхэн хэмжээний өртэй “Олон овоот”-ын ордыг худалдан авсандаа харамсдаг. 

“Хадгаламж” банкийг худалдан авснаас хойш Монголбанктай хамтран үйл ажиллагаа явуулсан.  Харилцагч, хадгаламж эзэмшигчийн эрх ашгийг хүндэтгэж ийм арга хэмжээ авч байна. Надад итгэж мөнгөө хадгалуулсан олон сая хүний мөнгийг найдвартай байлгахын тулд Монголбанктай ярилцан тохироод ийм шийдвэрт хүрсэн. Банкны хөрөнгийг “Жаст групп”-тээ зарцуулсан юм биш. Угаасаа миний хөрөнгө оруулалтын хэмжээ дууссан.

Гадаад, дотоодоос хөрөнгө оруулалт татах хэрэгтэй болсон. Дотоодод “Хадгаламж” банкид хөрөнгө оруулалт хийхэд тэнцэх хүн олдоогүй. Тиймээс гаднаас хөрөнгө оруулалт татахын тулд “Стандарт” банкнаас 109 сая ам.долларыг зээлсэн. Өмнөд Африкийн тус банкнаас мөнгө зээлэхийн тулд эхний ээлжинд “Эрдэнэт” үйлдвэрийг барьцаалж 20 сая ам.долларыг зээлсэн. 

Эрдэнэт” үйлдвэртэй 1997 оноос түншийн харилцаатай явж ирсэн болохоор холбогдох албаны хүмүүстэй ярилцаад гэрээ байгуулж, “Эрдэнэт” үйлдвэрийг барьцаанд тавьж зээл авсан. Хэд хэдэн удаа авсан. Одоогоор төлөх ёстой 120 сая ам.доллар үлдээд байгаа юм байна. Гэрээ байгуулахад “Эрдэнэт” үйлдвэрийн ерөнхий захирал асан Ч.Ганзориг, Төрийн өмчийн хорооны дарга асан Д.Сугарын гарын үсгийг авсан" гэх зэргээр ярьж байв. 

 

Т.Хэрлэн 

 

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.