“Ebarimt” аппликейшнаар импортын машины гаалийн мэдээлэл, түүхийг харах боломжтой боллоо

2020 оны 10 сарын 19

“Ebarimt” аппликейшн ашиглан импортоор орж ирсэн автомашины гаалийн мэдээлэл, түүхийг харах боломжтой болжээ. Энэ талаар Гааль, татвар, санхүүгийн мэдээллийн технологийн төв, Гаалийн ерөнхий газар, ШӨХТГ-аас мэдээлэл хийлээ.

Мэдээллийн эхэнд 2020 оны дөрөвдүгээр сарын 1-нээс хойш гаалиар орж ирсэн автомашины гаалийн мэдээллийн түүхийг ибаримт аппликэйшн болон гэрэгэ киоск ашиглан хэрэглэгч бүр харах боломжтой болсныг онцолсон юм.

Энэ талаар ШӨХТГ-ын дарга Б.Бат-Эрдэнэ "Ибаримт систем 2019 оноос эхлэн хэрэгжиж эхэлсэн. Одоогийн байдлаар нийт 146 төрийн үйлчилгээ бий. Хилээр орж байгаа машиныг хэдэн километр зам туулсан, ямар гэмтэлтэй, хил дээр хэдний хэдэн цагт бүртгэгдсэн зэрэг мэдээллийг гар утаснаасаа харах боломжтой. 

Бид Сангийн яамны харъяа Гааль татвар, санхүү мэдээллийн төв голлон ажиллаж ШӨХТГ-ын Хэрэглэгчийн мэдээллийн төвд ирсэн гомдлыг үндэслэж, Авто тээврийн үндэсний төвтэй хамтарсаны үр дүнд ийнхүү ажил хэрэг болж байна. Мөн импортоор орж ирж байгаа автомашины 4 талын бодит зургийг оруулдаг болсноор сэлбэг нэрээр орж ирээд угсрагдах, осолд орсон мөртлөө засварлагдан шинэ гэж зарагдах нөхцлийг хааж, авто машин хэрэглэгчдийн эдийн засаг, цаг хугацааг хэмнэсэн ажил болно гэдгийг тодотгосон юм.

"EBARIMT" аппликэйшныг ашиглан тухайн тээврийн хэрэгслийн мэдээллийг авах зааврыг хүргэж байна.

2019 оны статистикаар Монгол Улсын хэмжээнд бүртгэлтэй 934142 тээврийн хэрэгсэл байгаагийн 735 мянга нь хөдөлгөөнд оролцож байгаагийн 76 хувь нь 10 болон түүнээс дээш жилийн насжилттай байна.
•    0-3 жилийн насжилттай тээврийн хэрэгсэл нийт тээврийн хэрэгслийн 3 хувь
•    3-6 жилийн насжилттай нь 3 хувь
•    6-9 жилийн насжилттай 16 хувь байна.

2019 онд Монгол Улсын хилээр 69 мянган тээврийн хэрэгсэл орж ирсний 85-93 хувь нь  хуучин буюу хэт хуучин гэсэн бүртгэлтэй байна. Товчхондоо, иргэд худалдан авах гэж буй машинаа аль улсаас орж ирсэн, осолд орж байсан эсэх түүхийг тухайн машины арлын дугаарыг Ebarimt-д оруулснаар мэдээллийг харах боломжтой болж байна.

Хурлын үеэр ШӨХТГ-ын дарга Б.Бат-Эрдэнэ "Ихэвчлэн осолд орсон автомашинуудыг хилээр оруулж ирж засаад Монголд шинэ машин мэт худалдаалдаг. Манай улсад орж ирж буй машины 70 гаруй хувь нь Япон Улсаас орж ирсэн байдаг. Бид Япон Улсаас Монгол Улсад суугаа Элчин сайдын яамтай хамтарч ажиллана" гэв
 

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.