Б.Пүрэвдорж: Гуйлга гуйж байж үг хэлдэг боллоо

2020 оны 10 сарын 22

УИХ-ын чуулганы нэгдсэн хуралдаанаар УИХ-ын гишүүн С.Бямбацогт нарын гишүүдийн өргөн мэдүүлсэн Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг хэлэлцлээ. 

Монгол Улсын Үндсэн хуульд оруулсан нэмэлт, өөрчлөлт болон шинэчлэн найруулсан Монгол Улсын Их Хурлын тухай хуульд нийцүүлэн 2020 оны 5 дугаар сарын 13-ны өдөр шинэчлэн баталсан Монгол Улсын Их Хурлын чуулганы хуралдааны дэгээр 2020 оны ээлжит сонгуулиар бүрдсэн Улсын Их Хурлын Анхдугаар чуулган болон ээлжит бус чуулганаа зохион байгуулсан. Гэвч энэ явцад шинэчлэн найруулсан дэгийн тухай хуулийн зарим зохицуулалтыг тодруулах, нарийвчлах шаардлага тулгарсан учраас нэр бүхий гишүүд энэхүү хуулийн төслийг санаачлан боловсруулжээ.

УИХ-ын чуулганы хуралдааныг үр нөлөөтэй явуулах, хуралдаан эхлэхэд бэлтгэл хангагдсан байх, зарим нэн яаралтай, шаардлагатай асуудалтай танилцах боломжийг гишүүдэд олгох үүднээс чуулганы нэгдсэн хуралдааны ирцэд бүртгүүлэх цагийг 09:00 цагаас эхлүүлж 10:00 цагаас нэгдсэн хуралдааныг эхлүүлэх, товлосон асуудлыг ажлын цагт багтаан хэлэлцэж дуусаагүй бол хуралдаанд оролцсон гишүүдийн олонхын саналаар хуралдааны цагийг сунгаж болох зохицуулалтыг хуулийн төсөлд тусгасан байна.

Мөн хууль санаачлагч дараагийн ээлжит чуулганаар хэлэлцэх асуудлын жагсаалтад оруулах саналаа тухайн ээлжит чуулган дуусахаас ажлын 10 хоногийн өмнө Төрийн байгуулалтын байнгын хороонд хүргүүлэх, ээлжит чуулганаар хэлэлцэх асуудлыг баталсан Улсын Их Хурлын тогтоолд заасан хууль, тогтоолын төслийг хэлэлцэх дарааллыг Зөвлөлийн саналыг харгалзан УИХ-ын дарга сар бүр захирамжаар баталж, уг захирамжийг үндэслэн холбогдох Байнгын хороод цаглабар баталж, мөрдөхөөр тусгажээ.

Түүнчлэн хуралдааны дэг зөрчсөн гишүүн тухайн асуудлын хэлэлцүүлэг дуустал хуралдаан даргалагчийн шаардлагаар танхимыг орхин гарахыг хариуцлагын нэг төрөл болгох, үргэлжлүүлэн зөрчил гаргавал тухайн өдрийн хуралдаанд оролцох эрхийг хасах, хуралдаанд оролцох эрхээ хасуулсан гишүүн УИХ-ын болон гишүүний нэр хүндийг гутаан доромжилсон, эмх замбараагүй байдал үүсгэсэн болон бусад хэлбэрээр хуралдааны хэвийн үйл ажиллагааг алдагдуулбал хуралдаанд оролцох эрхийг нь гурав хүртэл удаа хасахаар зохицуулж, хариуцлагын хугацааг тодорхой болгох, зөрчил гаргасан гишүүнд хүлээлгэсэн хариуцлага нь зөвхөн тухайн Байнгын, дэд, түр хорооны болон нэгдсэн хуралдаанд хамаарахаар тогтоох зохицуулалтыг тусгасан байна.

Энэ мэт заалтуудыг зарим гишүүд дэмжихгүй байгаагаа илэрхийлж  байна. Өөрөөр хэлбэл гишүүдийн үг хэлэх  боломжийг хязгаарлах, танхимаас  гаргах зэрэг заалт нь сөрөг хүчний амыг хамхих гэсэн оролдлого  гэж УИХ-ын гишүүн Н.Алтанхуяг, С.Ганбаатар, Д.Ганбат, Б.Пүрэвдорж нар эсэргүүцэж байлаа.

Тухайлбал УИХ-ын гишүүн Б.Пүрэвдорж "Надад зориулж ийм хууль батлах гэж байгаа юм уу. Өнөөдөр та нар цөөнхийн төлөөллөө хуралдаанаас хөөх, үгийг нь хэлүүлэхгүй байх  ийм л хууль батлах гэж байна. Гэхдээ цаг эргэдэг юм шүү.Ан олонх болохоороо энэ хуулийг чинь хамгийн түрүүнд хүчингүй болгоно. Харин ч цөөнхийн төлөөллийн үг хэлэх хугацааг зургаан минут болгож нэмнэ. Албан тушаалтан бүр цөөнхийн төлөөллийн асуултад бүрэн дүүрэн хариулдаг байх тэр зохицуулалтыг хийнэ.

Цөөнхийн эрх хамгаалагдсан тэр цаг ардчиллын эрх баталгааждаг. Гэтэл та бүхэн 14 гишүүний эрхийг боох гэж байна. Цөөнхийн эрхийг хааж ЖДҮ, тендер хулгайлах гэж байгаа биз дээ. Л.Оюун-Эрдэнэ 2 тэрбум төгрөгөөр  хөшөө барина гэчихээд түүнийгээ 800 саяар барьж, үлдсэнийг нь хулгайлсан түүнд ямар хариуцлага тооцох юм бэ. Даргын зөвлөл хэлэлцэх асуудлыг баталдаг. УИХ-ын даргаас гуйлга гуйж байж хэлэлцэх асуудалдаа оруулж өгөхийг гуйж байна" гэх зэргээр эсэргүүцлээ. 

Гишүүдийн  олонх нь уг хуулийн төслийг хэлэлцэхийг дэмжсэн тул төслийг анхны хэлэлцүүлэгт  шилжүүлэхээр  Төрийн байгуулалтын байнгын хороонд  шилжүүллээ. 

Т.Хэрлэн 

 

 

Сэтгэгдэл (2)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
2020 оны 10 сарын 24
66.181.161.94
Zochin

Ene hvn yasan ch ih uurtai urj taschsan avirtai hvnbedee yasan geel uurlaad baidag nuhur veee er ni ene hvn ih hurald suugaad yu hiij bvteesen hvn yum bol neg l ih uurlasan zagnasan zanasan buun har vvl baihiin emchid vzvvlbel deer degee pvrevdorj oooooo

2020 оны 10 сарын 22
31.165.231.3
irgen

Ulsiin ih hural hodoonii MAN-iinhnaar dyyreed byr bydyyleg gej jigteihen boljee