Л.Мөнхтүшиг: Ирэх сард 10 удаагийн нислэг үйлдэж иргэдээ татаж авна

2020 оны 10 сарын 28

Эрүүл мэндийн яамны хэвлэлийн хуралд Гадаад харилцааны яамны Консулын газрын захирал Л.Мөнхтүшиг оролцож мэдээлэл өглөө.

Тэрбээр “Өнөөдөр буюу аравдугаар сарын 28-ны байдлаар гадаад улсаас 26,192 иргэн эх орондоо ирээд байна. Үүнээс агаарын замаар 91 улсаас 19,611 иргэнийг татан авсан бол авто замаар 6,581 иргэнийг хил нэвтрүүлээд байна. Өнөө ирэх Токио-Улаанбаатарын нислэгээр 200 орчим иргэн эх орондоо ирэх юм. Энэхүү нислэг нь хилийн хязгаарлалт тогтоосноос хойш үйлдэж байгаа тусгай үүргийн 100 дахь нислэг гэдгээрээ онцлогтой.

Ирэх арваннэгдүгээр сард нийт 10 удаагийн нислэг үйлдэж иргэдээ татаж авна.

Солонгос улсад оршин суугаа манай иргэдийн тоо их байдагтай холбоотойгоор Сөүл рүү нийт зургаан удаагийн нислэгийг үйлдэхээр болсон. Харин Токио хот руу хоёр удаагийн нислэг үйлдэгдэнэ. Энэ нислэгийн үндсэн зорилго нь Япон улс руу зорчих визээ авсан иргэдийг хүргэх зорилготой юм.

Уг нислэгээр Япон улсад байгаа болон тус улсаас дамжин эх орондоо ирэх хүсэлтэй иргэдийг авчрах боломжтой. Европын чиглэлд арваннэгдүгээр сарын 19-ний өдөр Франкфурт руу нислэг үйлдэнэ. Уг нислэгээр Европын улс орнуудад байгаа иргэд эх орондоо ирэх юм.

Арваннэгдүгээр сарын 6-ны өдөр мөн Казахстан улс руу нэг нислэг үйлдэж, Казахстанд байгаа цөөн тооны иргэд байгааг авчрах юм” гэлээ. Мөн Турк улсаас эх орондоо ирэх хүсэлтэй иргэд бий. Тэдгээр хүмүүсийг арваннэгдүгээр сардаа багтаан татаж авах боломжийг судалж байна.

Түүнчлэн 2020 оны зургаадугаар сарын 2-ноос хойш БНСУ-ын Хууль зүйн яам гуравдагч улсаас Монгол Улс руу үйлдэгдэж байгаа болон Монгол Улсаас эхлэлтэй гуравдагч улс руу зорчих иргэдэд транзит хориг тавьсан байгаа. Энэ асуудлыг бид БНСУ-ын талтай ярилцаж цуцлуулах асуудлыг тавьж байна" гэсэн мэдээллийг өглөө. 

Г.Сар

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.