Л.Мөнхбаясгалан: Усны эсрэг кноп дардаг, цэнгэг усыг уул уурхайд хэрэглүүлэх сонирхолтой гишүүдийг одоо хараад аваарай

УИХ-ын чуулганы өнөөдрийн хуралдаанаар Усны тухай хуулийн шинэчилсэн найруулгыг хэлэлцэж байна. Энэ талаар хууль санаачлаг УИХ-ын гишүүн Л.Мөнхбаясгалангаас тодрууллаа. Тэрбээр

“Уул уурхайн компаниуд таван тонн усыг нэг хайрцаг тамхинаас хямд үнээр хэрэглэж байгаа. Тийм учраас баяжуулах, олборлох үйлдвэрүүдэд хэрэглэх усны үнийг нэмнэ. Тэр нь Байгалийн нөөц ашигласны төлбөрийн тухай хуулийг дагуулж нэмж байгаа. Монгол Улсад өнөөдөр есөн аймгийн 56 сумын иргэд ундны усны эх үүсвэргүй болсон. Нэн яаралтай ундны усны судалгаа хийж өгөх санал тавьсан байхад төр засаг нь харахгүй өчнөөн жил болж байгаа. Энэ байдал цааш үргэлжлээд байх юм уу. Бид зөвхөн уул уурхайн төлөө амьдраагүй. Өнгөрсөн хугацаанд уул уурхай ажлаа хийг, тэд орлоготой байг гэж явж ирсэн. Уул уурхайн компаниуд 2025 оны байдлаар 887 тэрбум төгрөгийн хөнгөлөлт эдэлсэн. Энэ тоо бол их наяд гэсэн үг. Гэтэл өнөөдөр уул уурхайн компаниуд говийн бүсэд нэг литр усыг 1.20 төгрөгөөр хэрэглэдэг байхад иргэд литр усыг хоёр төгрөгөөр авдаг. Уул уурхай ашиг олох, иргэд амьдрахын тулд хэрэглэж байна. Энэ шударга ёс уу. Усны тухай хуульд энэ бүх зохицуулалтыг оруулна. Хүн бүр усны хэрэгцээгээ хангадаг байх ёстой.

Нөгөө талдаа, байгаль экологи, экосистемээ авч үлдэе. Гуравдугаарт, газар тариалан, дөрөвт уул уурхай байх ёстой. Уул уурхай шинэ технологи нэвтрүүл, гүний цэнгэг ус хэрэглэхээ боль. Усыг дахин боловсруулж ашиглах ёстой. Өнөөдрийн УИХ-ын чуулганыг анхааралтай ажиглах юм бол уул уурхайн лобби орсон, санхүүжилт авдаг гишүүд тодорхой болно. Усны эсрэг кноп дардаг, цэнгэг усыг уул уурхайд хэрэглүүлэх сонирхолтой гишүүдийг одоо харна. Бид хуулийн төслөө өнөөдөр хэлэлцүүлнэ. 14 жилийн дараах шинэчилсэн найруулга юм. Ус биш алт, нүүрс хэрэгтэй юу гэдгийг одоо харъя” гэлээ.