Жүдо бөхийн ДАШТ өнөөдөр эхэлнэ

Жүдо бөхийн энэ оны Дэлхийн аварга шалгаруулах тэмцээн Азербайжаны Баку хотноо өнөөдөр эхэлнэ. Энэ удаагийн ДАШТ-д дэлхийн зургаан тивийн 93 улсын 622 жүдоч эрэгтэй, эмэгтэй тус бүр долоон жингийн ангилал, холимог багийн төрөлд дэлхийн аварга цолны төлөө өрсөлдөнө.

Өнөөдөр уламжлал ёсоор эрэгтэй 60, эмэгтэй 48 кг-ын жингийн тэмцээн болох хуваарьтай.

Баку Улаанбаатар дөрвөн цагийн зөрүүтэй, хэсгийн барилдаанууд орон нутгийн цагаар 11.30 цагт /Улаанбаатарын цагаар 15.30 цаг/, шигшээ барилдаанууд 18.00 цагаас /Улаанбаатарын цагаар 22.00 цаг/ эхэлнэ.

Тэмцээний сугалаа өчигдөр явагдсан. Өнөөдөр барилдах тамирчдынхаа оноолтыг танилцууля.

60 кг

ОУХМ Т.Түмэнжаргал D хэсгийн эхний тойрогт Узбекистаны Бахром Ботуровтой таарсан. Түүнийг ялбал Азербайжаны Ахмад Юсифовтой барилдана.

ОУХМ Б.Сүхбат С хэсгийн эхний тойрогт Украины Артем Лесиуктай таарсан. Түүнийг ялбал БНХАУ-ын Сун Жиахаотай барилдана. Ялбал Японы бөх, дэлхийн аварга Р.Нагаяматай шөвгийн наймд үлдэхийн төлөө барилдах төлөвтэй байна.

48 кг

ОУХМ Ж.Анударь А хэсэгт эхний тойрогт хийлэх, улмаар Бразилийн Кларис Риберотой 1/16 шигшээд таарах сугалаа татжээ. Бразилийг аргалчихвал Парагвайн Габриэла Нарваэс, Энэтхэгийн Асмита Деу нарын ялсантай нь шөвгийн наймд үлдэхийн төлөө барилдахаар байна.

ОУХМ Б.Баасанхүү С хэсэгт эхний тойрогт хийлсэн. Ялбал Казахстаны Галия Тынбаева, Тайванийн Лин Чен Хао нарын ялсантай 1/16 шигшээд барилдана. Ялаад гараад ирвэл Кубын шилдэг бөх, одоо АНУ-ын нэрийн өмнөөс барилдаж буй Мариа Сели Лаборде, Шведийн шилдэг залуу бөх Тара Бабулфат нарын ялсантай шөвгийн наймд үлдэхийн төлөө барилдана.