Гурван хүний амийг хөнөөсөн М.Батчулууны давж заалдах шатны шүүх хурал энэ сарын 20-нд болно

Жирэмсэн эмэгтэйг дөрвөн настай охиных нь хамт хэрцгийгээр хөнөөсөн М.Батчулууны давж заалдах шатны шүүх хурал энэ сарын 20-нд товлогджээ.

М.Батчулуун Нийслэлийн эрүүгийн хэргийн давж заалдах шатны шүүхэд “хэргийг үнэн зөв шүүж өгнө үү” хэмээн өргөдөл бичсэн талаар бид өмнө нь мэдээлсэн.

Хэрэгтэн М.Батчулуун нь F20 буюу шизофрени өвчнөөр өвдсөн гэж оношлогдсон нэгэн бөгөөд өмнө нь 2020 онд гудамжинд алхаж явсан хүнийг хөнөөж, улмаар СЭМҮТ-д албадан эмчлүүлж байсан ч СЭМҮТ-ийн эмч нарын дүгнэлтийн дагуу 2024 онд эмнэлгээс гаргаж байсан юм.

Мөн энэ төрлийн өөр нэг хэрэг үйлдсэн ч ял эдэлж байгаагүй. Харин бага Дарь эхэд гарсан хэрэг дээр өмгөөлөгч нар нь түүний сэтгэцийн эрүүл мэндийг тодорхойлуулахаар СЭМҮТ-д хандаж, улмаар шүүхээс хэрэг хүлээх чадвартай хэмээн үзэж бүх насаар нь хорих ял оноосон юм.

Хэргийг эргэн сануулбал, 2026 оны нэгдүгээр сарын 04-ны өдөр М.Батчулуун 32 настай жирэмсэн эмэгтэй болон дөрвөн настай охиныг хэрцгийгээр хөнөөсөн. Мөн гурван настай охиныг нь цээжин тус газар нь гурван удаа хутгалж, зүрх уушгийг нь хүнд гэмтээж, гарын бугуй хэсгийг нь мэсээр хэд хэдэн удаа зүссэн байдаг.

Хэргийн дараа П.Сувданхуяг манай сайтын редакцид өмгөөлөгчийн туслалцаа хүсэж хандсан ба өмгөөлөгч Р.Булгамаа болон Э.Нямсүрэн нар үнэ төлбөргүй өмгөөлж өгсөн. М.Батчулуунд бүх насаар нь хорих л оноосны дараа П.Сувданхуяг “Шүүх шударга байдгийг харлаа, хэдийгээр эхнэр хүүхэд маань босоод ирэхгүй ч гэсэн хэрэгтэнд бүх насаар нь хорих ял оноолоо” хэмээн нулимс дуслуулсан хэлж байсан юм.