Залуус нэгдэж, "Реформ" клуб байгуулжээ

Монгол Улсад реформ хэрэгтэй байна. Харин юуг, яаж, хэрхэн шинэчлэх вэ? Хоосон хийрхэл, хуурай шүүмжлэл биш бодит шийдэл, мэргэжлийн байр суурь, нэгдмэл үнэт зүйл, цэгцрэх үйл явц бидэнд илүү хэрэгтэй байна гэсэн итгэл үнэмшил дор нэгдсэн залуус “Реформ” клуб байгуулж, бямба гарагт анхны уулзалтаа хийжээ.

Намууд доторх явцуу ашиг сонирхлын бүлгүүд төрийн системийг гацааж, нийгмийн хэт туйлшрал гаарч, авлига, хүнд суртал, шударга бус байдлыг үл тэвчих иргэдийн бухимдал нэмэгдсээр байна. Энэ бүхний эцсийн хохирогч нь иргэд, бидний үр хүүхэд. Бидний ирээдүй үүний төлөөсийг төлөх ёсгүй гэж клубыг үүсгэн байгуулагчид үзэж байгаа аж.
Асуудлыг зөвхөн шүүмжлээд өнгөрөхгүй. Харин реформын бодит санал, шийдэл гарган бодлого тодорхойлох түвшинд идэвхтэй оролцож, хүчтэй нөлөөлөх цаг нь болсон гэж уулзалтад оролцсон залуус байр суурь нэгдсэн байна. Нийгэм, улс төр, эдийн засаг, намуудын шинэчлэлээс эхлээд боловсрол, эрүүл мэнд, технологи хүртэл Монголын ирээдүйд, иргэн бүрт хамаатай асуудлуудыг салбар бүрийн шилдэг мэргэжилтнүүдийн оролцоотойгоор, хамтын хүчээр шийдэх нь бидний гол зорилго гэж анхныхаа уулзалтаар тодорхойлжээ.

Клубийнхэн “Шинэчлэлийг бидний өмнөөс хэн ч хийхгүй, харин бид өөрсдөө хийх ёстой. Чиний, таны, бидний оролцоо л нийгэмд гэрэл асаах болно” хэмээн онцоллоо.