З.Төмөртөмөө: Үр хүүхэд, улс орныхоо хөгжил дэвшлийг харах бол ахмадуудын маань чин хүсэл

Чингэлтэй дүүргийн ЗДТГ, Дүүргийн төлөөлөгчид ахмадуудаа хүлээн авч, хүндэтгэл үзүүллээ. Арга хэмжээнд НИТХ-ын төлөөлөгч З.Төмөртөмөө болон Чингэлтэй дүүргийн Засаг даргын орлогч Н.Бямбагэрэл, дүүргийн ИТХ-ын дарга Т.Уламбаяр нар оролцож, ахмадуудтайгаа нэгэн өдрийг өнгөрөөж байна.

НИТХ-ын Төлөөлөгч З.Төмөртөмөө "Төр засаг тогтвортой байж, ахмадын тэтгэврийн шинэчлэлт амжилттай хийгдэж, "Сэлбэ" дэд төвийн бүтээн байгуулалт идэвхтэй өрнөж, дүүрэг улс орон маань өргөжин хөгжих болтугай. Үр хүүхэд, улс орныхоо хөгжил дэвшлийг харах бол та бүхний минь чин хүсэл. Залуучууд улс нийгмээ хөгжүүлэхийн төлөө манлайлан гарч ирж байна. Тиймээс та бүхнийхээ ачийг хариулж, хариуцлагатай ажиллаж чадна гэдэгт итгэлтэй байна” хэмээн тодотгон хэлэв.

Чингэлтэй дүүргээс ахмадууддаа зориулсан арга хэмжээг тогтмол зохион байгуулж, буурлууддаа тулгамдаж буй асуудлыг сонсдог. Энэ ч утгаараа Ахмадын хөгжлийг дэмжих төвийг үе шаттай нээж байна. Мөн зарим ӨЭМ-ийн төвүүдэд Ахмадын эмчийг томилон ажлуулж байгаа нь бусад дүүргээс онцлогтой.

Түүнчлэн, ахмад настанруу чиглэсэн Уламжлалтын сэргээн засах төвийг нээхээр бүтээн байгуулалтын ажил явагдаж байна. Энэ мэт ахмадуудад чиглэсэн эрүүл мэндийн хүртээмж сайжирч байгаад азай буурлууд маань баяртай байгаагаа илэрхийлж байлаа.