С.Бямбацогт: Монгол Улсыг Оюутолгой биш оюунлаг ард түмэн хөгжүүлнэ

Оюутолгойн ногдол ашгийг хэрхэн зарцуулах талаар УИХ-ын дарга С.Бямбацогтоос тодрууллаа.

Тэрбээр "2009 оноос хойш 17 жилийн дараа өнөөдрийн Засгийн газар, тэр дундаа холбогдох сайд нар болон ажлын хэсэг үр дүнтэй ажилласны дүнд тодорхой ахиц дэвшил гарлаа. Тухайлбал, 2037 оноос хүртэхээр тооцогдож байсан ногдол ашгийн хугацааг 10–11 жилээр наашлуулж, 2026-2027 оноос хүртэх боломжийг бүрдүүлсэн нь энэхүү ажлын бодит үр дүн юм.

Засгийн газраас Оюутолгой төслөөс 3 их наяд төгрөгийн ногдол ашиг авахаар тооцоолж, уг хөрөнгийн 1 их наяд төгрөгийг Хуримтлалын санд төвлөрүүлэхээр тусгасан. Харин үлдсэн 2 их наяд төгрөгийг улс орны нийгэм, эдийн засагт өгөөжөө өгөх, иргэдийн амьдралд нэн тулгамдсан асуудалд зарцуулахаар төлөвлөсөн.

Монгол Улсыг Оюутолгой биш оюунлаг ард түмэн хөгжүүлнэ.

Засгийн газар өргөн барьсан нэг удаагийн хуулийн төслөө арга буюу эргүүлэн татсанд харамсаж байна. "Алаагүй баавгайн арьсыг хуваах" гэж ярьсаар эцэстээ аль ч үгүй болчихлоо.

Иймд цаашид улсын төсөв батлах үеэр УИХ-аас Засгийн газарт тодорхой чиглэл өгсөн тогтоол гаргаж, ногдол ашгийг түргэн хугацаанд авах үйл явцыг баталгаажуулан, түүнийг эдийн засаг, иргэдийн амьдралд хамгийн үр өгөөжтэй байдлаар зарцуулах эрх зүйн зохицуулалтыг хийх нь зүйтэй гэсэн байр суурьтай байна" гэв.